mohabbaton ki shaKH pe jo khil raha gulab hai

mohabbatoñ kī shāḳh pe jo khil rahā gulāb hai

kisī nigāh-e-'ishq kī du'ā-e-mustajāb hai

tirī nigāh-e-mast kā koī to aa.ina bane

ye kyā ki chashm-e-nam meñ bas ki aab hai sarāb hai

ulajh gayā na sho’bda-garoñ ke makr-chakr meñ

kahā nahīñ thā kyā tujhe ye rāsta ḳharāb hai

sadā-e-‘ishq marhabā sadā-e-kun zah-e-nasīb

ḳhudā ke ham sab aur 'ishq hamārā intiḳhāb hai

hamārī dhaḌkaneñ zarā Thahar ga.iiñ to kyā huā

hamāre bāzuoñ ko terā lams dastyāb hai

kabhī to is pe kaan rakh kabhī to is ko paḌh zarā

sirāt-e-mustaqīm kī jo āḳhirī kitāb hai

balā kī vahshateñ liye balā kī naġhmagī liye

zamīn-e-dil pe roz shaam utartā māhtāb hai

mohabbaton ki shaKH pe jo khil raha gulab hai

kisi nigah-e-'ishq ki du'a-e-mustajab hai

teri nigah-e-mast ka koi to aaina bane

ye kya ki chashm-e-nam mein bas ki aab hai sarab hai

ulajh gaya na sho’bda-garon ke makr-chakr mein

kaha nahin tha kya tujhe ye rasta KHarab hai

sada-e-‘ishq marhaba sada-e-kun zah-e-nasib

KHuda ke hum sab aur 'ishq hamara intiKHab hai

hamari dhaDkanen zara Thahar gain to kya hua

hamare bazuon ko tera lams dastyab hai

kabhi to is pe kan rakh kabhi to is ko paDh zara

siraat-e-mustaqim ki jo aaKHiri kitab hai

bala ki wahshaten liye bala ki naghmagi liye

zamin-e-dil pe roz sham utarta mahtab hai