mohabbaton mein bhi mal-o-manal mangte hain

mohabbatoñ meñ bhī māl-o-manāl māñgte haiñ

ye kaise log haiñ ajr-e-visāl māñgte haiñ

vabāl-e-jāñ the shab-o-roz kal jo apne liye

guzar ga.e to vahī māh-o-sāl māñgte haiñ

samajh meñ aayā nahīñ un kā mudda.ā kyā hai

likheñ javāb to phir vo savāl māñgte haiñ

mohabbatoñ kī dukāneñ ujaḌne vaalī haiñ

uruuj dekh chuke haiñ zavāl māñgte haiñ

dil-o-dimāġh kī ye ḳhosha-chīniyāñ dekho

tujhe gañvā ke tire ḳhadd-o-ḳhāl māñgte haiñ

kahīñ to bhuul huī hai ki aaj tere liye

uruuj māñgne vaale zavāl māñgte haiñ

vo tujh se karte haiñ merī shikāyateñ lekin

mujhī se vo tire ḳhvāb-o-ḳhayāl māñgte haiñ

mohabbaton mein bhi mal-o-manal mangte hain

ye kaise log hain ajr-e-visal mangte hain

wabaal-e-jaan the shab-o-roz kal jo apne liye

guzar gae to wahi mah-o-sal mangte hain

samajh mein aaya nahin un ka muddaa kya hai

likhen jawab to phir wo sawal mangte hain

mohabbaton ki dukanen ujaDne wali hain

uruj dekh chuke hain zawal mangte hain

dil-o-dimagh ki ye KHosha-chiniyan dekho

tujhe ganwa ke tere KHadd-o-KHal mangte hain

kahin to bhul hui hai ki aaj tere liye

uruj mangne wale zawal mangte hain

wo tujh se karte hain meri shikayaten lekin

mujhi se wo tere KHwab-o-KHayal mangte hain