محبتوں میں وفا کا حساب کیا رکھنا

محبتوں میں وفا کا حساب کیا رکھنا

کسی کتاب میں سوکھے گلاب کیا رکھنا

وہ کم سخن تو نہیں ہیں مگر یہ سوچا ہے

کہ ان سے جاری سوال و جواب کیا رکھنا

وہ میرے حال سے اچھی طرح سے واقف ہیں

پھر ان کے سامنے دل کی کتاب کیا رکھنا

نہیں ہے داغ کوئی گر ہمارے دامن پر

تو پھر یہ فکر عذاب و ثواب کیا رکھنا

پلٹ کے بیتے ہوئے دن کبھی نہیں آتے

گیا شباب تو یاد شباب کیا رکھنا

حجاب غیر سے رکھنا سمجھ میں آتا ہے

نہیں وہ غیر تو ان سے حجاب کیا رکھنا

ہمارے دل میں تو دریا بسا ہے جہلم کا

نظر میں اپنی سمندر کے باب کیا رکھنا