mohlat na de zara bhi mujhe meri jaan khinch

mohlat na de zarā bhī mujhe merī jaan khīñch

maiñ aarzū tamām huuñ apnī kamān khīñch

ik mahshar-e-jamāl uThā toḌ de jumūd

tīr-e-nazar zamīn se tā-āsmān khīñch

maiñ aa rahā huuñ barsar-e-mauj-e-havā-e-gul

tū laakh apne gird hisār-e-makān khīñch

lamhāt-e-be-amāñ bhī ġhanīmat haiñ paas aa

mauzū-e-dīgarāñ bhī na ab darmiyān khīñch

vo lab-chashīdnī haiñ vo dāman-kashīdnī

aa.e na gar yaqīñ to pa.e-imtihān khīñch

'sahbā' ye shahr-e-zīst sadāoñ kā shahr hai

ya.anī tanāb-e-hasrat-e-husn-e-bayān khīñch

mohlat na de zara bhi mujhe meri jaan khinch

main aarzu tamam hun apni kaman khinch

ek mahshar-e-jamal uTha toD de jumud

tir-e-nazar zamin se ta-asman khinch

main aa raha hun barsar-e-mauj-e-hawa-e-gul

tu lakh apne gird hisar-e-makan khinch

lamhat-e-be-aman bhi ghanimat hain pas aa

mauzu-e-digaran bhi na ab darmiyan khinch

wo lab-chashidni hain wo daman-kashidni

aae na gar yaqin to pae-imtihan khinch

'sahba' ye shahr-e-zist sadaon ka shahr hai

yani tanab-e-hasrat-e-husn-e-bayan khinch