mohr-ba-lab hai kis liye, kis liye bolta nahin

mohr-ba-lab hai kis liye, kis liye boltā nahīñ

ai dil-e-be-talab! batā kyā koī mudda.ā nahīñ

ahl-e-junūñ ko ab ke bhī izn-e-junūñ milā nahīñ

ab ke baras bhī baaġh meñ phuul koī khilā nahīñ

apnā qusūr hai to ye, aur koī ḳhatā nahīñ

ham ne faqīh-e-shahr ko maanā kabhī ḳhudā nahīñ

ye to huā ki raushnī aur bhī kuchh bhaḌak uThī

tez havā ke bāvajūd dil kā diyā bujhā nahīñ

rāh-e-talab meñ aaj tak ahl-e-talab kā qāfila

yuuñ hī ravāñ-davāñ rahā aur kabhī thakā nahīñ

kis se talab kareñ bhalā ḳhuun kā apne ḳhūñ-bahā

apne alāva aur koī apnā harīf thā nahīñ

dil kā ajiib rañg hai aur vo shaḳhs sañg hai

tā-ba-nigāh duur tak jis kā koī patā nahīñ

mohr-ba-lab hai kis liye, kis liye bolta nahin

ai dil-e-be-talab! bata kya koi muddaa nahin

ahl-e-junun ko ab ke bhi izn-e-junun mila nahin

ab ke baras bhi bagh mein phul koi khila nahin

apna qusur hai to ye, aur koi KHata nahin

hum ne faqih-e-shahr ko mana kabhi KHuda nahin

ye to hua ki raushni aur bhi kuchh bhaDak uThi

tez hawa ke bawajud dil ka diya bujha nahin

rah-e-talab mein aaj tak ahl-e-talab ka qafila

yun hi rawan-dawan raha aur kabhi thaka nahin

kis se talab karen bhala KHun ka apne KHun-baha

apne alawa aur koi apna harif tha nahin

dil ka ajib rang hai aur wo shaKHs sang hai

ta-ba-nigah dur tak jis ka koi pata nahin