mohr ban kar jo main ek roz bhi ubhra hota

mohr ban kar jo maiñ ik roz bhī ubhrā hotā

barf kī tarah hai jo shaḳhs vo dariyā hotā

tujh se dilkash hai kahīñ tere tasavvur kā jahāñ

tū mire paas bhī hotā to maiñ tanhā hotā

apne māhaul ko har phuul ne mahkāyā hai

mujh ko honā thā kisī kā to maiñ apnā hotā

pūchhtā kaun hai siipī meñ chhape motī ko

jo tire dil meñ thā hoñToñ pe bhī aayā hotā

kis ne rakkhā hai mire sar pe kaḌī dhuup meñ haath

chhat jo hotī to mire ghar meñ bhī saayā hotā

yuuñ guzartā na tire sar se ye paanī 'ḳhāvar'

tū ne tūfān ko uThte hī jo rokā hotā

mohr ban kar jo main ek roz bhi ubhra hota

barf ki tarah hai jo shaKHs wo dariya hota

tujh se dilkash hai kahin tere tasawwur ka jahan

tu mere pas bhi hota to main tanha hota

apne mahaul ko har phul ne mahkaya hai

mujh ko hona tha kisi ka to main apna hota

puchhta kaun hai sipi mein chhape moti ko

jo tere dil mein tha honTon pe bhi aaya hota

kis ne rakkha hai mere sar pe kaDi dhup mein hath

chhat jo hoti to mere ghar mein bhi saya hota

yun guzarta na tere sar se ye pani 'KHawar'

tu ne tufan ko uThte hi jo roka hota