muaf ai shan-e-kibriyai ye arz meri gila nahin hai

muaaf ai shān-e-kibriyā.ī ye arz merī gila nahīñ hai

ki tere dar ke sivā mirā sar kisī ke dar par jhukā nahīñ hai

hasīn thiiñ zindagī kī rāheñ to aql-o-dānish ke giit gaa.e

jo aa.iiñ dushvāriyāñ to chīḳhe ḳhudā nahīñ hai ḳhudā nahīñ hai

ġhalat thā armān-e-rāhat-e-dil fuzūl thī koshish-e-masarrat

sukūn māyūs ho ke paayā ki ab koī aasrā nahīñ hai

hamārā īmāñ husūl-e-daulat banāyā makr-o-daġhā ko fitrat

zabāñ se iqrār hai ḳhudā kā gumān ye hai ḳhudā nahīñ hai

namāz to hai farīza-e-rab namāz paḌh kar duā na māñgo

duā ḳhudā se mutālba hai mutālba iltijā nahīñ hai

har ek ne.amat hameñ mayassar tamām duniyā hamārī duniyā

hameñ milā dard-āshnā dil hamāre qabze meñ kyā nahīñ hai

tavāzun-e-nūr-o-nār meñ hai baqā-e-tanzīm-e-nau-e-insāñ

vo ḳhud kareñge ḳhudā ko paidā jo kah rahe haiñ ḳhudā nahīñ hai

muaf ai shan-e-kibriyai ye arz meri gila nahin hai

ki tere dar ke siwa mera sar kisi ke dar par jhuka nahin hai

hasin thin zindagi ki rahen to aql-o-danish ke git gae

jo aain dushwariyan to chiKHe KHuda nahin hai KHuda nahin hai

ghalat tha arman-e-rahat-e-dil fuzul thi koshish-e-masarrat

sukun mayus ho ke paya ki ab koi aasra nahin hai

hamara iman husul-e-daulat banaya makr-o-dagha ko fitrat

zaban se iqrar hai KHuda ka guman ye hai KHuda nahin hai

namaz to hai fariza-e-rab namaz paDh kar dua na mango

dua KHuda se mutalba hai mutalba iltija nahin hai

har ek neamat hamein mayassar tamam duniya hamari duniya

hamein mila dard-ashna dil hamare qabze mein kya nahin hai

tawazun-e-nur-o-nar mein hai baqa-e-tanzim-e-nau-e-insan

wo KHud karenge KHuda ko paida jo kah rahe hain KHuda nahin hai