مدعائے اثر الفت پنہاں نکلا

مدعائے اثر الفت پنہاں نکلا

لے کے ہم راہ مرا دل ترا پیکاں نکلا

آج کس نے غم دنیا سے رہائی پائی

کون کوچے سے ترے چاک گریباں نکلا

اٹھ گیا خیر میں ارمان لئے دنیا سے

آپ کے دل کا تو ارمان مری جاں نکلا

ذبح کر کے مجھے کیا جانئے کیا یاد آیا

قتل گہہ سے مرا قاتل بھی پشیماں نکلا

صاف ظاہر ہے جو ہے خانۂ زنجیر اداس

مر کے زنداں سے کوئی بے سر و ساماں نکلا

دفعتاً کر دئے سفاک نے لاکھوں ٹکڑے

دم بھی نکلا مرے دل کا تو پریشاں نکلا

اپنے کوچے میں جسے تم نے کیا تھا پامال

یہی وہ دل تھا نہ جس کا کوئی ارماں نکلا

ناصریؔ پائی نہ فرصت کہ غزل کہتے خوب

حوصلہ کچھ نہ سر بزم سخنداں نکلا