muddaa-e-asar-e-ulfat-e-pinhan nikla

mudda.ā-e-asar-e-ulfat-e-pinhāñ niklā

le ke hamrāh mirā dil tirā paikāñ niklā

aaj kis ne ġham-e-duniyā se rihā.ī paa.ī

kaun kūche se tire chāk-garebāñ niklā

uTh gayā ḳhair maiñ armān liye duniyā se

aap ke dil kā to armān mirī jaañ niklā

zab.h kar ke mujhe kyā jāniye kyā yaad aaya

qatl-gah se mirā qātil bhī pashemāñ niklā

saaf zāhir hai jo hai ḳhāna-e-zanjīr udaas

mar ke zindāñ se koī be-sar-o-sāmāñ niklā

daf.atan kar diye saffāk ne lākhoñ TukḌe

dam bhī niklā mire dil kā to pareshāñ niklā

apne kūche meñ jise tum ne kiyā thā pāmāl

yahī vo dil thā na jis kā koī armāñ niklā

'nāsirī' paa.ī na fursat ki ġhazal kahte ḳhuub

hausla kuchh na sar-e-bazm-e-suḳhan-dāñ niklā

muddaa-e-asar-e-ulfat-e-pinhan nikla

le ke hamrah mera dil tera paikan nikla

aaj kis ne gham-e-duniya se rihai pai

kaun kuche se tere chaak-gareban nikla

uTh gaya KHair main arman liye duniya se

aap ke dil ka to arman meri jaan nikla

zabh kar ke mujhe kya jaaniye kya yaad aaya

qatl-gah se mera qatil bhi pasheman nikla

saf zahir hai jo hai KHana-e-zanjir udas

mar ke zindan se koi be-sar-o-saman nikla

dafatan kar diye saffak ne lakhon TukDe

dam bhi nikla mere dil ka to pareshan nikla

apne kuche mein jise tum ne kiya tha pamal

yahi wo dil tha na jis ka koi arman nikla

'nasiri' pai na fursat ki ghazal kahte KHub

hausla kuchh na sar-e-bazm-e-suKHan-dan nikla