muddaa girya se kuchh ishq ka izhaar nahin

mudda.ā girya se kuchh ishq kā iz.hār nahīñ

kyā kahūñ tum se ki kahne meñ dil-e-zār nahīñ

is meñ kyā zillat-e-yūsuf sar-e-bāzār nahīñ

sāmne tere koī us kā ḳharīdār nahīñ

ho gayā aaj se bas ilm-e-qiyāfa bātil

sādgī se ye khulā thā ki sitamgār nahīñ

sab tarah se to vo achchhe haiñ par achchhe kyā haiñ

ik yahī aib hai kaisā ki vafādār nahīñ

talab-e-bosa-e-ruḳhsār ko jaane diije

kaun sī baat hai jis meñ tumheñ inkār nahīñ

yaañ ye manzūr ki matlab ko zabāñ par laa.eñ

vaañ hai añgusht laboñ par ki ḳhabar-dār nahīñ

pūchhte pūchhte aa jaao mere ghar kī taraf

hai pata ye ki nishān-e-dar-o-dīvār nahīñ

mere rone pe vo hañs hañs ke ye kahnā terā

ki tunuk-zarf se chhupte kabhī asrār nahīñ

koī pis jaa.e ki kaT jaa.e balā se un kī

kuchh ḳhabar un ko kisī kī dam-e-raftār nahīñ

tār-e-anfās haiñ siine ke numāyāñ varna

dekhne ko bhī garebāñ meñ koī taar nahīñ

sach to ye hai ki hai 'mushtāq' adū se achchhā

varna banda to kisī kā bhī taraf-dār nahīñ

muddaa girya se kuchh ishq ka izhaar nahin

kya kahun tum se ki kahne mein dil-e-zar nahin

is mein kya zillat-e-yusuf sar-e-bazar nahin

samne tere koi us ka KHaridar nahin

ho gaya aaj se bas ilm-e-qiyafa baatil

sadgi se ye khula tha ki sitamgar nahin

sab tarah se to wo achchhe hain par achchhe kya hain

ek yahi aib hai kaisa ki wafadar nahin

talab-e-bosa-e-ruKHsar ko jaane dije

kaun si baat hai jis mein tumhein inkar nahin

yan ye manzur ki matlab ko zaban par laen

wan hai angusht labon par ki KHabar-dar nahin

puchhte puchhte aa jao mere ghar ki taraf

hai pata ye ki nishan-e-dar-o-diwar nahin

mere rone pe wo hans hans ke ye kahna tera

ki tunuk-zarf se chhupte kabhi asrar nahin

koi pis jae ki kaT jae bala se un ki

kuchh KHabar un ko kisi ki dam-e-raftar nahin

tar-e-anfas hain sine ke numayan warna

dekhne ko bhi gareban mein koi tar nahin

sach to ye hai ki hai 'mushtaq' adu se achchha

warna banda to kisi ka bhi taraf-dar nahin