muddat hui sheron ke siwa kuchh nahin kahta

muddat huī she'roñ ke sivā kuchh nahīñ kahtā

yā'nī maiñ ba-juz nāz-o-adā kuchh nahīñ kahtā

kartā hai mohabbat to parastish kī hadoñ tak

barham ho to ġhusse meñ vo kyā kuchh nahīñ kahtā

darvesh tabī'at mujhe virse meñ milī hai

maiñ Thiik ġhalat achchhā burā kuchh nahīñ kahtā

detā hai koī shoḳh badan izn-e-jasārat

tū haath baḌhā band-e-qabā kuchh nahīñ kahtā

ai nek manush merī nahīñ fikr kar apnī

ujḌe hue logoñ ko ḳhudā kuchh nahīñ kahtā

ye jo nazar aatā hai har ik daaġh salāmat

yuuñ hai ki purāne ko nayā kuchh nahīñ kahtā

rotā hai bahut jo bhī nayā aa.e jahāñ meñ

hotā hai qafas se jo rihā kuchh nahīñ kahtā

muddat hui she'ron ke siwa kuchh nahin kahta

ya'ni main ba-juz naz-o-ada kuchh nahin kahta

karta hai mohabbat to parastish ki hadon tak

barham ho to ghusse mein wo kya kuchh nahin kahta

darwesh tabi'at mujhe wirse mein mili hai

main Thik ghalat achchha bura kuchh nahin kahta

deta hai koi shoKH badan izn-e-jasarat

tu hath baDha band-e-qaba kuchh nahin kahta

ai nek manush meri nahin fikr kar apni

ujDe hue logon ko KHuda kuchh nahin kahta

ye jo nazar aata hai har ek dagh salamat

yun hai ki purane ko naya kuchh nahin kahta

rota hai bahut jo bhi naya aae jahan mein

hota hai qafas se jo riha kuchh nahin kahta