muddat ke baad un se mulaqat ho gai

muddat ke baa'd un se mulāqāt ho ga.ī

achchhā huā talāfī-e-māfāt ho ga.ī

mahsūs raushnī meñ huā raat ho ga.ī

is darja tez shiddat-e-jazbāt ho ga.ī

nīchī nazar se pursish-e-jazbāt ho ga.ī

go vo rahe ḳhamosh magar baat ho ga.ī

jis daur meñ bhī 'azm ko rahbar banā liyā

tārīḳh apnī hasb-e-rivāyāt ho ga.ī

tark-e-ta'alluqāt kī buniyād kuchh nahīñ

baiThe-biThā.e yuuñ hī bas ik baat ho ga.ī

nākām dil huā to sharāra sā jal uThā

sahmī vafā to talḳhī-e-jazbāt ho ga.ī

ḳhātir meñ vo use bhī na laa.e kabhī 'jamāl'

vo be-ruḳhī jo jān-e-shikāyāt ho ga.ī

muddat ke ba'd un se mulaqat ho gai

achchha hua talafi-e-mafat ho gai

mahsus raushni mein hua raat ho gai

is darja tez shiddat-e-jazbaat ho gai

nichi nazar se pursish-e-jazbaat ho gai

go wo rahe KHamosh magar baat ho gai

jis daur mein bhi 'azm ko rahbar bana liya

tariKH apni hasb-e-riwayat ho gai

tark-e-ta'alluqat ki buniyaad kuchh nahin

baiThe-biThae yun hi bas ek baat ho gai

nakaam dil hua to sharara sa jal uTha

sahmi wafa to talKHi-e-jazbaat ho gai

KHatir mein wo use bhi na lae kabhi 'jamal'

wo be-ruKHi jo jaan-e-shikayat ho gai