muddat se dar pe hai mere tala paDa hua

muddat se dar pe hai mire taalā paḌā huā

maiñ apne ghar se huuñ kahīñ bāhar gayā huā

jo thī lakīr nuur kī vo hai miTī huī

jo hai charāġh taaq meñ vo hai bujhā huā

bāteñ ḳhayāl-o-ḳhvāb kī kartā nahīñ huuñ maiñ

dekhā hai maiñ ne dasht meñ dariyā paḌā huā

donoñ hī ke mizāj meñ taḳhrīb thī bahut

us kā bhalā huā hai na merā bhalā huā

phir us ke baad āsmāñ terā banegā kyā

maiñ is zamīñ kī qaid se jis din rihā huā

bāġh-o-bahār bhī huuñ maiñ vīrān bhī huuñ maiñ

ḳhushiyoñ ke saath saath hai ġham bhī lagā huā

dīvār-o-dar se vahshateñ jaatī nahīñ 'sahar'

ik dasht hai makān se mere milā huā

muddat se dar pe hai mere tala paDa hua

main apne ghar se hun kahin bahar gaya hua

jo thi lakir nur ki wo hai miTi hui

jo hai charagh taq mein wo hai bujha hua

baaten KHayal-o-KHwab ki karta nahin hun main

dekha hai main ne dasht mein dariya paDa hua

donon hi ke mizaj mein taKHrib thi bahut

us ka bhala hua hai na mera bhala hua

phir us ke baad aasman tera banega kya

main is zamin ki qaid se jis din riha hua

bagh-o-bahaar bhi hun main viran bhi hun main

KHushiyon ke sath sath hai gham bhi laga hua

diwar-o-dar se wahshaten jati nahin 'sahar'

ek dasht hai makan se mere mila hua