muddaton se jami barf ke junhi tude pighalne lage

muddatoñ se jamī barf ke jūñhī tuude pighalne lage

gahre namkīn paanī jahāzoñ ke peñde nigalne lage

maiñ kahīñ baiTh kar biite lamhoñ ko tasbīh kartā rahā

aur āñkhoñ kī tah meñ chhupe rang parteñ badalne lage

tez āñdhī kisī mauj meñ mere āsār ko chhū ga.ī

aur kisī 'ahd ke kitne matrūk mā’bad nikalne lage

maiñ zamāne kī sarhad se us paar thā aur ḳhāmosh thā

maiñ ne un ke bhī hisse kā gaayā to vo saath chalne lage

vaqt kī lai mire saath ham-raqs thī aur baġhal-gīr thī

phir sabhī sarmadī naġhme āzurda sāzoñ meñ Dhalne lage

maiñ palaT aayā huuñ ḳhushk hote hue sāhiloñ kī taraf

ab mujhe is se kyā pattharoñ se bhī chashme ubalne lage

muddaton se jami barf ke junhi tude pighalne lage

gahre namkin pani jahazon ke pende nigalne lage

main kahin baiTh kar bite lamhon ko tasbih karta raha

aur aankhon ki tah mein chhupe rang parten badalne lage

tez aandhi kisi mauj mein mere aasar ko chhu gai

aur kisi 'ahd ke kitne matruk ma’bad nikalne lage

main zamane ki sarhad se us par tha aur KHamosh tha

main ne un ke bhi hisse ka gaya to wo sath chalne lage

waqt ki lai mere sath ham-raqs thi aur baghal-gir thi

phir sabhi sarmadi naghme aazurda sazon mein Dhalne lage

main palaT aaya hun KHushk hote hue sahilon ki taraf

ab mujhe is se kya pattharon se bhi chashme ubalne lage