muft mein kyon len shab-e-gham maut ke aane ka nam

muft meñ kyoñ leñ shab-e-ġham maut ke aane kā naam

hausle kā past ho jaanā hai mar jaane kā naam

ab nahīñ lete dil-e-nādāñ ke samjhāne kā naam

jaise aatā hī na ho un ko taras khāne kā naam

ik zamāna thā nigāh-e-sharmagīñ uThtī na thī

ab sar-e-mahfil nahīñ lete vo sharmāne kā naam

kū-e-jānāñ meñ pahuñch kar jaise jannat mil ga.ī

ab dil-e-nādāñ nahīñ letā hai ghar jaane kā naam

mard-e-qāne ko kisī shai kī nahīñ hotī kamī

tang-dastī hai havas meñ haath phailāne kā naam

munhasir hai dil kī dhaḌkan par hī insāñ kī hayāt

varna marg-e-nā-gahāñ hai dil Thahar jaane kā naam

hai tulū-e-sub.h yā tābānī-e-rū-e-sabīh

manzar-e-shām-e-siyah gesū bikhar jaane kā naam

apne rūThe ko manānā 'zabt' go āsāñ nahīñ

hai taqāzā-e-mohabbat leñ na ghabrāne kā naam

muft mein kyon len shab-e-gham maut ke aane ka nam

hausle ka past ho jaana hai mar jaane ka nam

ab nahin lete dil-e-nadan ke samjhane ka nam

jaise aata hi na ho un ko taras khane ka nam

ek zamana tha nigah-e-sharmagin uThti na thi

ab sar-e-mahfil nahin lete wo sharmane ka nam

ku-e-jaanan mein pahunch kar jaise jannat mil gai

ab dil-e-nadan nahin leta hai ghar jaane ka nam

mard-e-qane ko kisi shai ki nahin hoti kami

tang-dasti hai hawas mein hath phailane ka nam

munhasir hai dil ki dhaDkan par hi insan ki hayat

warna marg-e-na-gahan hai dil Thahar jaane ka nam

hai tulu-e-subh ya tabani-e-ru-e-sabih

manzar-e-sham-e-siyah gesu bikhar jaane ka nam

apne ruThe ko manana 'zabt' go aasan nahin

hai taqaza-e-mohabbat len na ghabrane ka nam