muhaal tha ki ye tufan-e-rang-o-bu aae

muhāl thā ki ye tūfān-e-rañg-o-bū aa.e

agar bahār tirā pairahan na chhū aa.e

bayān-e-dard aur is anjuman meñ dīvāno

kahāñ Dubo ke mohabbat kī aabrū aa.e

ye uñgliyāñ ki ab ik jaam ko tarastī haiñ

kabhī unhīñ se sitāroñ kī nabz chhū aa.e

na is qadar bhī takalluf se kaam lo ki sharāb

jo aa.e bhī to nazar ḳhūn-e-ārzū aa.e

hamārā pī ke bahaknā bhī kaam kā niklā

ki mai-kade meñ na.e sāġhar-o-subū aa.e

vo aa.ine the jo hairān ho ga.e 'ḳhāvar'

jamāl-e-dost hamāre tū rū-ba-rū aa.e

muhaal tha ki ye tufan-e-rang-o-bu aae

agar bahaar tera pairahan na chhu aae

bayan-e-dard aur is anjuman mein diwano

kahan Dubo ke mohabbat ki aabru aae

ye ungliyan ki ab ek jam ko tarasti hain

kabhi unhin se sitaron ki nabz chhu aae

na is qadar bhi takalluf se kaam lo ki sharab

jo aae bhi to nazar KHun-e-arzu aae

hamara pi ke bahakna bhi kaam ka nikla

ki mai-kade mein nae saghar-o-subu aae

wo aaine the jo hairan ho gae 'KHawar'

jamal-e-dost hamare tu ru-ba-ru aae