mujhko barah-e-rast koi tajraba nahin

mujh ko barāh-e-rāst koī tajraba nahīñ

in gul-ruḳhoñ meñ kahte haiñ bū-e-vafā nahīñ

kuchh bevafā.iyāñ bhī zarūrī haiñ 'ishq meñ

varna ḳhudā gavāh hai maiñ bevafā nahīñ

shauq-e-gunāh-o-‘azm-e-baġhāvat nahīñ rahā

ye kam sazā nahīñ hai ki koī bhī sazā nahīñ

is dasht-e-ġham meñ ġham ke sivā kaun aa.egā

chup-chāp so raho ye kisī kī sadā nahīñ

kyā kyā huā bayāñ ke liye 'umr chāhiye

yuuñ pūchh lījiye ki abhī kyā huā nahīñ

ham sirf shab ko ro liye bas aur kyā kiyā

kis muñh se phir kaheñ koī apnā huā nahīñ

ye aag bujh rahī hai ise ab havā na do

tum se to koī raaz hamārā chhupā nahīñ

ḳhvāboñ ke qāfile kahīñ zulfoñ meñ kho ga.e

āñkhoñ meñ aaj niiñd kā kosoñ patā nahīñ

ā.īna mujh ko jāniye hairat na kījiye

ḳhud aap sāmne haiñ koī dūsrā nahīñ

shukr-e-ḳhudā nazar kabhī nīchī nahīñ huī

ye sar bhī aaj tak kabhī bejā jhukā nahīñ

aise ta'alluqāt ko jo chāho naam do

itnā qarīb koī tumhāre sivā nahīñ

husn-e-vafā-navāz tirā shukriya magar

itnā udaas dil kabhī pahle huā nahīñ

ranj us ne kuchh sivā diye ye haq usī kā thā

itnā qarīb dūsrā koī rahā nahīñ

ab dekhnā hai kaun sī ho jiddat-e-karam

apne hisāb se to koī ġham bachā nahīñ

mahbūba-e-firāq hai ai 'badr' duḳht-e-raz

lāzim thā ehtirām udhar ruḳh kiyā nahīñ

mujh ko barah-e-rast koi tajraba nahin

in gul-ruKHon mein kahte hain bu-e-wafa nahin

kuchh bewafaiyan bhi zaruri hain 'ishq mein

warna KHuda gawah hai main bewafa nahin

shauq-e-gunah-o-‘azm-e-baghawat nahin raha

ye kam saza nahin hai ki koi bhi saza nahin

is dasht-e-gham mein gham ke siwa kaun aaega

chup-chap so raho ye kisi ki sada nahin

kya kya hua bayan ke liye 'umr chahiye

yun puchh lijiye ki abhi kya hua nahin

hum sirf shab ko ro liye bas aur kya kiya

kis munh se phir kahen koi apna hua nahin

ye aag bujh rahi hai ise ab hawa na do

tum se to koi raaz hamara chhupa nahin

KHwabon ke qafile kahin zulfon mein kho gae

aankhon mein aaj nind ka koson pata nahin

aaina mujh ko jaaniye hairat na kijiye

KHud aap samne hain koi dusra nahin

shukr-e-KHuda nazar kabhi nichi nahin hui

ye sar bhi aaj tak kabhi beja jhuka nahin

aise ta'alluqat ko jo chaho nam do

itna qarib koi tumhaare siwa nahin

husn-e-wafa-nawaz tera shukriya magar

itna udas dil kabhi pahle hua nahin

ranj us ne kuchh siwa diye ye haq usi ka tha

itna qarib dusra koi raha nahin

ab dekhna hai kaun si ho jiddat-e-karam

apne hisab se to koi gham bacha nahin

mahbuba-e-firaq hai ai 'badr' duKHt-e-raz

lazim tha ehtiram udhar ruKH kiya nahin