mujhko fareb dene ki koshish bahut hui

mujh ko fareb dene kī koshish bahut huī

phīke tabassumoñ kī numā.ish bahut huī

paanī bhī itnā barsā ke tūfān aa ga.e

is saal pattharoñ kī bhī bārish bahut huī

ham se tamām saal kī tafsīl pūchhiye

hamdardiyoñ ke naam pe sāzish bahut huī

jitne ghane daraḳht the jaḌ se ukhaḌ ga.e

kal raat āñdhiy.oñ kī navāzish bahut huī

naqqād bhī ta’alluq-e-ḳhātir meñ bah ga.e

tanqīd kam huī hai satā.ish bahut huī

pechīda mas.aloñ ne sañbhalne nahīñ diyā

jiine kī tarah jiine kī ḳhvāhish bahut huī

bīnā.ī hairatoñ se na bāhar nikal sakī

parde ke pīchhe sāyoñ meñ jumbish bahut huī

mujh ko fareb dene ki koshish bahut hui

phike tabassumon ki numaish bahut hui

pani bhi itna barsa ke tufan aa gae

is sal pattharon ki bhi barish bahut hui

hum se tamam sal ki tafsil puchhiye

hamdardiyon ke nam pe sazish bahut hui

jitne ghane daraKHt the jaD se ukhaD gae

kal raat aandhiyon ki nawazish bahut hui

naqqad bhi ta’alluq-e-KHatir mein bah gae

tanqid kam hui hai sataish bahut hui

pechida masalon ne sanbhalne nahin diya

jine ki tarah jine ki KHwahish bahut hui

binai hairaton se na bahar nikal saki

parde ke pichhe sayon mein jumbish bahut hui