mujhko kahan ye hosh teri jalwa-gah mein

mujh ko kahāñ ye hosh tirī jalva-gāh meñ

jalve meñ hai nigāh ki jalva nigāh meñ

vo kyā nigāh jo na kisī dil meñ ghar kare

vo dil hī kyā na ho jo kisī kī nigāh meñ

mujh ko zamāne-bhar ke ġhamoñ se najāt hai

jab se hai merā dil tire ġham kī panāh meñ

pahle gunāhgār tamāshā huī nigāh

lazzat-sharīk phir huā dil is gunāh meñ

nisbat hī kyā savāb ko mere gunāh se

sau sau savāb haiñ mire ik ik gunāh meñ

tere jamāl-e-nāz kā husn-e-kamāl hai

ḳhud jalva ban gayā huuñ tirī jalva-gāh meñ

ābād hai jahān-e-vafā un kī yaad se

barbād ho ga.e jo mohabbat kī raah meñ

uThtī nahīñ nigāh kisī samt ai 'sahāb'

kis husn-e-be-badal ke haiñ jalve nigāh meñ

mujh ko kahan ye hosh teri jalwa-gah mein

jalwe mein hai nigah ki jalwa nigah mein

wo kya nigah jo na kisi dil mein ghar kare

wo dil hi kya na ho jo kisi ki nigah mein

mujh ko zamane-bhar ke ghamon se najat hai

jab se hai mera dil tere gham ki panah mein

pahle gunahgar tamasha hui nigah

lazzat-sharik phir hua dil is gunah mein

nisbat hi kya sawab ko mere gunah se

sau sau sawab hain mere ek ek gunah mein

tere jamal-e-naz ka husn-e-kamal hai

KHud jalwa ban gaya hun teri jalwa-gah mein

aabaad hai jahan-e-wafa un ki yaad se

barbaad ho gae jo mohabbat ki rah mein

uThti nahin nigah kisi samt ai 'sahab'

kis husn-e-be-badal ke hain jalwe nigah mein