mujhko KHak-e-dar-e-mai-KHana banaya hota

mujh ko ḳhāk-e-dar-e-mai-ḳhāna banāyā hotā

phir usī ḳhaak se paimāna banāyā hotā

jalva-gar husn-e-majāzī meñ haqīqat hotī

ka.aba-e-dil ko sanam-ḳhāna banāyā hotā

na mujhe rañg-e-chaman se koī matlab hotā

sūrat-e-sabza-e-begāna banāyā hotā

āp-bītī jo sunātā huuñ to kah dete haiñ

is se behtar koī afsāna banāyā hotā

mai-kashoñ ke jo muqaddar meñ na the ye daane

naḳhl-e-añgūr ko be-dāna banāyā hotā

umr bhar ḳhāna-e-ḳhummar meñ sar-ḳhush rahte

zindagī kā yahī paimāna banāyā hotā

kufr-o-īmāñ meñ na rahtī ye kashākash 'kaifī'

ka.aba-o-dair ko mai-ḳhāna banāyā hotā

mujh ko KHak-e-dar-e-mai-KHana banaya hota

phir usi KHak se paimana banaya hota

jalwa-gar husn-e-majazi mein haqiqat hoti

kaba-e-dil ko sanam-KHana banaya hota

na mujhe rang-e-chaman se koi matlab hota

surat-e-sabza-e-begana banaya hota

aap-biti jo sunata hun to kah dete hain

is se behtar koi afsana banaya hota

mai-kashon ke jo muqaddar mein na the ye dane

naKHl-e-angur ko be-dana banaya hota

umr bhar KHana-e-KHummar mein sar-KHush rahte

zindagi ka yahi paimana banaya hota

kufr-o-iman mein na rahti ye kashakash 'kaifi'

kaba-o-dair ko mai-KHana banaya hota