mujhko kya yaad hai kya bhul gaya yaad nahin

mujh ko kyā yaad hai kyā bhuul gayā yaad nahīñ

maiñ maraz bhuul gayā aur davā yaad nahīñ

'ishq ke tauq-o-salāsil meñ huuñ jakḌā lekin

maiñ ne kis jurm kī paa.ī hai sazā yaad nahīñ

ḳhaar bichhvā.e jin ahbāb ne rāhoñ meñ mirī

maiñ ne un se bhī kabhī kī ho daġhā yaad nahīñ

merī ḳhāmoshī ne mahbūb se hājat māñgī

maiñ vo saa.il huuñ jise koī sadā yaad nahīñ

apne mohsin ko bhulāne kā natīja ye hai

maiñ vo saa.il huuñ jise koī 'atā yaad nahīñ

jin ko ḳhud maiñ ne sikhāyā thā vafā kā matlab

ab unhīñ logoñ ko tahzīb-e-vafā yaad nahīñ

shahr-e-haq-soz meñ haq baat kahī thī maiñ ne

kab huā kaun huā mujh se ḳhafā yaad nahīñ

marja’-e-'ishq faqat zāt-e-ḳhudā hai 'salmān'

vādī-e-'ishq meñ kyoñ tum ko ḳhudā yaad nahīñ

mujh ko kya yaad hai kya bhul gaya yaad nahin

main maraz bhul gaya aur dawa yaad nahin

'ishq ke tauq-o-salasil mein hun jakDa lekin

main ne kis jurm ki pai hai saza yaad nahin

KHar bichhwae jin ahbab ne rahon mein meri

main ne un se bhi kabhi ki ho dagha yaad nahin

meri KHamoshi ne mahbub se hajat mangi

main wo sail hun jise koi sada yaad nahin

apne mohsin ko bhulane ka natija ye hai

main wo sail hun jise koi 'ata yaad nahin

jin ko KHud main ne sikhaya tha wafa ka matlab

ab unhin logon ko tahzib-e-wafa yaad nahin

shahr-e-haq-soz mein haq baat kahi thi main ne

kab hua kaun hua mujh se KHafa yaad nahin

marja’-e-'ishq faqat zat-e-KHuda hai 'salman'

wadi-e-'ishq mein kyon tum ko KHuda yaad nahin