mujhko mazi ka suhana sa zamana yaad hai

mujh ko maazī kā suhānā sā zamāna yaad hai

dostoñ se rāt-din milnā milānā yaad hai

bāhamī vo guftugū vo qahqahe sargoshiyāñ

mahfiloñ meñ baiTh kar hañsnā hañsānā yaad hai

lāla-o-gul par tavāf-e-ishq kartī titliyāñ

aur ġhunchoñ kā mahaknā lahlahānā yaad hai

nik.hat-e-gul se mo.attar vo bahār-e-gulsitāñ

vo hasīñ andāz se dil kā lubhānā yaad hai

sub.h-dam chalnā nazākat se nasīm-e-sub.h kā

aur chiḌiyoñ kā usī dam chahchahānā yaad hai

vo nishāne par kisī ko tāknā sayyād kā

daf.atan chiḌiyoñ kā mil kar ġhul machānā yaad hai

qatra-e-shabnam kā girnā phuul ke ruḳhsār par

aur bhañvaroñ kā vahāñ kuchh gungunānā yaad hai

pur-kashish ġhunchoñ ke dilkash aks kī vo aarsī

aur vo tāroñ ke jaise jhilmilānā yaad hai

ḳhushbū-o-ḳhush-rang phūloñ se muzayyan gulsitāñ

'faiz' vo bād-e-bahārāñ kā rijhānā yaad hai

mujh ko mazi ka suhana sa zamana yaad hai

doston se raat-din milna milana yaad hai

bahami wo guftugu wo qahqahe sargoshiyan

mahfilon mein baiTh kar hansna hansana yaad hai

lala-o-gul par tawaf-e-ishq karti titliyan

aur ghunchon ka mahakna lahlahana yaad hai

nikhat-e-gul se moattar wo bahaar-e-gulsitan

wo hasin andaz se dil ka lubhana yaad hai

subh-dam chalna nazakat se nasim-e-subh ka

aur chiDiyon ka usi dam chahchahana yaad hai

wo nishane par kisi ko takna sayyaad ka

dafatan chiDiyon ka mil kar ghul machana yaad hai

qatra-e-shabnam ka girna phul ke ruKHsar par

aur bhanwaron ka wahan kuchh gungunana yaad hai

pur-kashish ghunchon ke dilkash aks ki wo aarsi

aur wo taron ke jaise jhilmilana yaad hai

KHushbu-o-KHush-rang phulon se muzayyan gulsitan

'faiz' wo baad-e-bahaaran ka rijhana yaad hai