mujhko mere KHulus ki qimat nahin mili

mujh ko mire ḳhulūs kī qīmat nahīñ milī

ya.anī pasīna bah gayā ujrat nahīñ milī

maiñ muskurā ke dard sabhī Tāltā rahā

kyūñki mirī kisī se tabī.at nahīñ milī

yā-rab koī ḳhatā to nahīñ mujh se ho ga.ī

muddat huī hai koī musībat nahīñ milī

kyoñ dars de rahe ho hameñ dīniyāt par

kyā aap ko kahīñ se bhī rishvat nahīñ milī

yasrib se karbalā to ba-sad ḳhair aa gayā

vāpas madīna aane kī himmat nahīñ milī

sab ashk putliyoñ kī tahoñ meñ utar ga.e

mulzim ko ek lamhe kī mohlat nahīñ milī

be-fā.eda hasīñ ho agar aaj tak tumheñ

āshiq bahut mile haiñ mohabbat nahīñ milī

us ko to chhoḌne kī vajūhāt thiiñ bahut

tum se bhī ḳhair merī tabī.at nahīñ milī

jab se sināñ kī nok pe qur.ān aa gayā

ahl-e-zamīñ ko zinda tilāvat nahīñ milī

'mūsā' ne tuur tak kā safar tai kiyā magar

phir bhī use ḳhud apnī haqīqat nahīñ milī

mujh ko mere KHulus ki qimat nahin mili

yani pasina bah gaya ujrat nahin mili

main muskura ke dard sabhi Talta raha

kyunki meri kisi se tabiat nahin mili

ya-rab koi KHata to nahin mujh se ho gai

muddat hui hai koi musibat nahin mili

kyon dars de rahe ho hamein diniyat par

kya aap ko kahin se bhi rishwat nahin mili

yasrib se karbala to ba-sad KHair aa gaya

wapas madina aane ki himmat nahin mili

sab ashk putliyon ki tahon mein utar gae

mulzim ko ek lamhe ki mohlat nahin mili

be-faeda hasin ho agar aaj tak tumhein

aashiq bahut mile hain mohabbat nahin mili

us ko to chhoDne ki wajuhat thin bahut

tum se bhi KHair meri tabiat nahin mili

jab se sinan ki nok pe quran aa gaya

ahl-e-zamin ko zinda tilawat nahin mili

'musa' ne tur tak ka safar tai kiya magar

phir bhi use KHud apni haqiqat nahin mili