mujhko miTa ke aapne yun muskura diya

mujh ko miTā ke aap ne yuuñ muskurā diyā

jaise mire nasīb ko phir se banā diyā

kahte haiñ kis ko maut kise kahte haiñ hayāt

sab kuchh tirī nigāh ne mujh ko batā diyā

ab dil kī ḳhairiyat kī du'ā māñgnī paḌī

batlāne ko to 'ishq kā matlab batā diyā

qaa.il na hotā aap kī qudrat kā koī bhī

achchhā kiyā jo mujh ko banā ke miTā diyā

dil kī taraf se sabr hameñ aa gayā thā kuchh

bekār zikr chheḌ ke tum ne rulā diyā

'rāfat' yahāñ namāz kā koī nahīñ hai vaqt

jab naam un kā sun liyā sar ko jhukā diyā

mujh ko miTa ke aap ne yun muskura diya

jaise mere nasib ko phir se bana diya

kahte hain kis ko maut kise kahte hain hayat

sab kuchh teri nigah ne mujh ko bata diya

ab dil ki KHairiyat ki du'a mangni paDi

batlane ko to 'ishq ka matlab bata diya

qail na hota aap ki qudrat ka koi bhi

achchha kiya jo mujh ko bana ke miTa diya

dil ki taraf se sabr hamein aa gaya tha kuchh

bekar zikr chheD ke tum ne rula diya

'rafat' yahan namaz ka koi nahin hai waqt

jab nam un ka sun liya sar ko jhuka diya