mujhko nahin dimagh gulon ki shamim ka

mujh ko nahīñ dimāġh guloñ kī shamīm kā

ehsān kyoñ uThā.ūñ qafas meñ nasīm kā

merī nigāh-e-shauq pahuñch jā.egī vahīñ

paayā buland laakh ho tere harīm kā

phailī hai us kī ḳhāna-e-kā'ba meñ raushnī

hai dāġh-e-dil charāġh rah-e-mustaqīm kā

ham bū-e-gul ke saath qafas ko bhī le uḌe

aayā chaman meñ jab koī jhoñkā nasīm kā

ye mere ek ashk-e-nadāmat kā thā asar

sho'la bhaḌak ke bujh gayā nār-e-jahīm kā

mai-ḳhāna-e-azal kā huuñ maiñ mast vo 'zabīh'

piitā huuñ le ke naam ġhafūr-ur-rahīm kā

mujh ko nahin dimagh gulon ki shamim ka

ehsan kyon uThaun qafas mein nasim ka

meri nigah-e-shauq pahunch jaegi wahin

paya buland lakh ho tere harim ka

phaili hai us ki KHana-e-ka'ba mein raushni

hai dagh-e-dil charagh rah-e-mustaqim ka

hum bu-e-gul ke sath qafas ko bhi le uDe

aaya chaman mein jab koi jhonka nasim ka

ye mere ek ashk-e-nadamat ka tha asar

sho'la bhaDak ke bujh gaya nar-e-jahim ka

mai-KHana-e-azal ka hun main mast wo 'zabih'

pita hun le ke nam ghafur-ur-rahim ka