mujhko taufiq-e-intizar shadid

mujh ko taufīq-e-intizār shadīd

terā va.ada hai lā.eq-e-tajdīd

pursish-e-hāl aur ye tanz-e-latīf

mere zaḳhmoñ pe hai khulī tanqīd

aate rahiye kabhī tasavvur meñ

rahne diije rahī sahī ummīd

sham.eñ bujhtī haiñ dil sulagte haiñ

haa.e kyā chiiz hotī hai ummīd

aap mahfil se chal diye lekin

ban ga.e ham nishāna-e-tanqīd

ruḳhsat ai tīrgī-e-āḳhir-e-shab

jagmagātā hai chehra-e-ḳhurshīd

dard meñ tark-e-zabt kī talqīn

hai vafā kī rivāyatoñ se ba.iid

ḳhuun se bhīgne lagīñ palkeñ

haa.e re terā intizār-e-shadīd

dard-e-dil aur baḌh gayā 'nayyar'

bhīgī palkoñ ne kī hai jab tā.īd

mujh ko taufiq-e-intizar shadid

tera wada hai laeq-e-tajdid

pursish-e-haal aur ye tanz-e-latif

mere zaKHmon pe hai khuli tanqid

aate rahiye kabhi tasawwur mein

rahne dije rahi sahi ummid

shamen bujhti hain dil sulagte hain

hae kya chiz hoti hai ummid

aap mahfil se chal diye lekin

ban gae hum nishana-e-tanqid

ruKHsat ai tirgi-e-aKHir-e-shab

jagmagata hai chehra-e-KHurshid

dard mein tark-e-zabt ki talqin

hai wafa ki riwayaton se baid

KHun se bhigne lagin palken

hae re tera intizar-e-shadid

dard-e-dil aur baDh gaya 'nayyar'

bhigi palkon ne ki hai jab taid