mujh mein kisi ka aks na partaw Khaali aaina hun main

mujh meñ kisī kā aks na partav ḳhālī ā.īna huuñ maiñ

mere TukḌe kaun sameTe ab TūTūñ yā bikhrūñ maiñ

merī rasā.ī merī hadoñ tak terī fazā meñ tū bhī qaid

tū mujh tak aa.e to kyūñ-kar tujh tak kaise pahuñchūñ maiñ

ruḳh pe jo tere shafaq khilī hai ḳhuun hai mere ḳhvāboñ kā

kahe tū ai shām-e-tanhā.ī tujh se lipaT kar ro luuñ maiñ

duurī ke ye lamhe baḌh kar kahīñ na sadiyāñ ban jaa.eñ

tujh ko jab apne paas na pā.ūñ jaane kyā kyā sochūñ maiñ

dīvāroñ se sar Takrā.ūñ band darīchoñ ke pīchhe

khulī fazā meñ aa niklūñ to mauj-e-havā se uljhūñ maiñ

kaun sunegā ye tūlānī qissa kis ko fursat hai

jo kuchh mujh par biit rahī hai apne dil meñ rakkhūñ maiñ

lafzoñ meñ ehsās kī kaliyāñ khilā rahā huuñ ai 'maḳhmūr'

jaise koī mujh se kahtā ho aa tere lab chūmūñ maiñ

mujh mein kisi ka aks na partaw KHali aaina hun main

mere TukDe kaun sameTe ab TuTun ya bikhrun main

meri rasai meri hadon tak teri faza mein tu bhi qaid

tu mujh tak aae to kyun-kar tujh tak kaise pahunchun main

ruKH pe jo tere shafaq khili hai KHun hai mere KHwabon ka

kahe tu ai sham-e-tanhai tujh se lipaT kar ro lun main

duri ke ye lamhe baDh kar kahin na sadiyan ban jaen

tujh ko jab apne pas na paun jaane kya kya sochun main

diwaron se sar Takraun band darichon ke pichhe

khuli faza mein aa niklun to mauj-e-hawa se uljhun main

kaun sunega ye tulani qissa kis ko fursat hai

jo kuchh mujh par bit rahi hai apne dil mein rakkhun main

lafzon mein ehsas ki kaliyan khila raha hun ai 'maKHmur'

jaise koi mujh se kahta ho aa tere lab chumun main