mujh mein maujud hai jo chaak nahin khulta kuchh

mujh meñ maujūd hai jo chaak nahīñ khultā kuchh

ye mirā dīda-e-namnāk nahīñ khultā kuchh

naqsh ubhregā koī yā ki nahīñ ubhregā

kyā hai poshīda tah-e-ḳhāk nahīñ khultā kuchh

ye to tai hai ki ab is dil kā ziyāñ lāzim hai

vo hai ma.asūm ki chālāk nahīñ khultā kuchh

muntazir kaun se maiñ ālam-e-asbāb kā huuñ

kyā hai ab qismat-e-ḳhāshāk nahīñ khultā kuchh

kyuuñ bhalā us kī nishānī nahīñ miltī mujh ko

kyuuñ bhalā ġhurfa-e-idrāk nahīñ khultā kuchh

ab ye kyā hai mire atrāf nahīñ aatā samajh

aur ye matla-e-pechāk nahīñ khultā kuchh

band kyuuñ ashk na hoñ tab-e-ravāñ se ai 'tūr'

vo bhī to sūrat-e-aflāk nahīñ khultā kuchh

mujh mein maujud hai jo chaak nahin khulta kuchh

ye mera dida-e-namnak nahin khulta kuchh

naqsh ubhrega koi ya ki nahin ubhrega

kya hai poshida tah-e-KHak nahin khulta kuchh

ye to tai hai ki ab is dil ka ziyan lazim hai

wo hai masum ki chaalak nahin khulta kuchh

muntazir kaun se main aalam-e-asbab ka hun

kya hai ab qismat-e-KHashak nahin khulta kuchh

kyun bhala us ki nishani nahin milti mujh ko

kyun bhala ghurfa-e-idrak nahin khulta kuchh

ab ye kya hai mere atraf nahin aata samajh

aur ye matla-e-pechaak nahin khulta kuchh

band kyun ashk na hon tab-e-rawan se ai 'tur'

wo bhi to surat-e-aflak nahin khulta kuchh