mujh mein tanhai meri aur main tanhai mein

mujh meñ tanhā.ī mirī aur maiñ tanhā.ī meñ

ajnabī ho ga.e sab dasht-e-shanāsā.ī meñ

apne andar hī ra.ūnat kī fazā hai shāyad

log utarte hī nahīñ ruuh kī gahrā.ī meñ

khul gayā ab ki hai ādāb-e-mohabbat baḌī chiiz

ham jo mārūf hue jalva-e-rusvā.ī meñ

ye to tai hai ki mujhe tujh se judā honā hai

misl aañsū huuñ tirī chashm-e-tamannā.ī meñ

aap to hashr uThāne ke liye kahte the

aañkh tak uTh na sakī ālam-e-rusvā.ī meñ

umr kaaTī hai isī ek talab meñ 'āfāq'

ik nazar dekh le mujh ko koī tanhā.ī meñ

mujh mein tanhai meri aur main tanhai mein

ajnabi ho gae sab dasht-e-shanasai mein

apne andar hi raunat ki faza hai shayad

log utarte hi nahin ruh ki gahrai mein

khul gaya ab ki hai aadab-e-mohabbat baDi chiz

hum jo maruf hue jalwa-e-ruswai mein

ye to tai hai ki mujhe tujh se juda hona hai

misl aansu hun teri chashm-e-tamannai mein

aap to hashr uThane ke liye kahte the

aankh tak uTh na saki aalam-e-ruswai mein

umr kaTi hai isi ek talab mein 'afaq'

ek nazar dekh le mujh ko koi tanhai mein