mujh par un ka itab ho hi gaya

mujh par un kā itaab ho hī gayā

jaan par ik azaab ho hī gayā

dil mirā āḳhir ai ġham-e-jānāñ

tere hāthoñ ḳharāb ho hī gayā

laakh chāhā bachā.e is se ḳhudā

ishq-e-ḳhāna-ḳharāb ho hī gayā

ġhair ne imtihān de hī diyā

be-hayā kāmyāb ho hī gayā

mai-kade se gayā jo masjid ko

mujh ko hāsil savāb ho hī gayā

aap kā aur merā afsāna

shahr meñ intiḳhāb ho hī gayā

āḳhir ik roz vo but-e-kāfir

husn meñ lā-javāb ho hī gayā

us ne kī ġhair kī taraf-dārī

ye bhī roz-e-hisāb ho hī gayā

ġhash hai zāhid sharāb-e-kausar par

us ko shauq-e-sharāb ho hī gayā

dekhnā nāma-bar kī tarrārī

ye bhī hāzir-javāb ho hī gayā

dushmanoñ kī murād bar aa.ī

dostoñ par itaab ho hī gayā

ek do vaqt ke vo milne meñ

ġhair se be-hijāb ho hī gayā

vo na uTThe baġhair jaan liye

un kā maqsad shitāb ho hī gayā

bātoñ bātoñ meñ 'ranj' 'ranj' un se

āḳhir ik din janāb ho hī gayā

mujh par un ka itab ho hi gaya

jaan par ek azab ho hi gaya

dil mera aaKHir ai gham-e-jaanan

tere hathon KHarab ho hi gaya

lakh chaha bachae is se KHuda

ishq-e-KHana-KHarab ho hi gaya

ghair ne imtihan de hi diya

be-haya kaamyab ho hi gaya

mai-kade se gaya jo masjid ko

mujh ko hasil sawab ho hi gaya

aap ka aur mera afsana

shahr mein intiKHab ho hi gaya

aaKHir ek roz wo but-e-kafir

husn mein la-jawab ho hi gaya

us ne ki ghair ki taraf-dari

ye bhi roz-e-hisab ho hi gaya

ghash hai zahid sharab-e-kausar par

us ko shauq-e-sharab ho hi gaya

dekhna nama-bar ki tarrari

ye bhi hazir-jawab ho hi gaya

dushmanon ki murad bar aai

doston par itab ho hi gaya

ek do waqt ke wo milne mein

ghair se be-hijab ho hi gaya

wo na uTThe baghair jaan liye

un ka maqsad shitab ho hi gaya

baaton baaton mein 'ranj' 'ranj' un se

aaKHir ek din janab ho hi gaya