mujh sa gul-barz-o-gul-afkar gulistan mein nahin

mujh sā gul-barz-o-gul-afkār gulistāñ meñ nahīñ

phuul hī phuul haiñ kāñTe mire dāmāñ meñ nahīñ

yā batā dījiye ye rang-e-taġhāful kab tak

yā ye kah dījiye kuchh aap ke imkāñ meñ nahīñ

dil pareshān hai māhaul kī ġham-nākī se

ab mire saath kā qaidī koī zindāñ meñ nahīñ

ādamiyyat kī ye tauhīn ye taḳhrīb afsos

aur sab kuchh hai mohabbat dil-e-insāñ meñ nahīñ

aa maiñ samjhā.ūñ tujhe ġhāyat-e-sajda kyā hai

ḳhud kashish sar meñ ho sang-e-dar-e-jānāñ meñ nahīñ

apne maazī pe na ro haal ko rakh pesh-e-nazar

us safīne kī taraf dekh jo tūfāñ meñ nahīñ

ruḳh havāoñ ne is andāz se badlā 'maikash'

koī āsūda-nasheman hī gulistāñ meñ nahīñ

mujh sa gul-barz-o-gul-afkar gulistan mein nahin

phul hi phul hain kanTe mere daman mein nahin

ya bata dijiye ye rang-e-taghaful kab tak

ya ye kah dijiye kuchh aap ke imkan mein nahin

dil pareshan hai mahaul ki gham-naki se

ab mere sath ka qaidi koi zindan mein nahin

aadamiyyat ki ye tauhin ye taKHrib afsos

aur sab kuchh hai mohabbat dil-e-insan mein nahin

aa main samjhaun tujhe ghayat-e-sajda kya hai

KHud kashish sar mein ho sang-e-dar-e-jaanan mein nahin

apne mazi pe na ro haal ko rakh pesh-e-nazar

us safine ki taraf dekh jo tufan mein nahin

ruKH hawaon ne is andaz se badla 'maikash'

koi aasuda-nasheman hi gulistan mein nahin