mujhse kam-kosh ko be-kar ulaT jati hai

mujh se kam-kosh ko be-kār ulaT jaatī hai

jab vo sayyāroñ kī raftār ulaT jaatī hai

aa.ina piir hai shamshīr-zanī meñ us kā

us se laḌtā huuñ to talvār ulaT jaatī hai

itnā itrā na tū ḳhud jins kī zebā.ish par

vo binā dekhe hī bāzār ulaT jaatī hai

ek hai ghaav jo talvār ko khā jaatā hai

ek hai naav jo mañjdhār ulaT jaatī hai

chhābḌe sar se luḌhak jaate haiñ shahtūt bhare

vo jhalak hāsil-e-ashjār ulaT jaatī hai

maiñ ne yāroñ ko thamā dī hai ye duniyā-dārī

mere hāthoñ se ye har baar ulaT jaatī hai

ḳhauf ko sar pe savārī nahīñ karne denā

saa.e ke bojh se dīvār ulaT jaatī hai

mujh se kam-kosh ko be-kar ulaT jati hai

jab wo sayyaron ki raftar ulaT jati hai

aaina pir hai shamshir-zani mein us ka

us se laDta hun to talwar ulaT jati hai

itna itra na tu KHud jins ki zebaish par

wo bina dekhe hi bazar ulaT jati hai

ek hai ghaw jo talwar ko kha jata hai

ek hai naw jo manjdhaar ulaT jati hai

chhabDe sar se luDhak jate hain shahtut bhare

wo jhalak hasil-e-ashjar ulaT jati hai

main ne yaron ko thama di hai ye duniya-dari

mere hathon se ye har bar ulaT jati hai

KHauf ko sar pe sawari nahin karne dena

sae ke bojh se diwar ulaT jati hai