mujh tak rasai pae kahan mehr-o-mahtab

mujh tak rasā.ī paa.e kahāñ mehr-o-māhtāb

har ek ko nahīñ hai mirā qurb dastyāb

pahuñchā.ī duur duur talak 'ilm-o-āgahī

apne ta.iiñ kiyā hai jahāñ-bhar ko faiz-yāb

garche rah-e-junūñ meñ hue bārhā sitam

phir bhī yaqīn hai hameñ ham hoñge kāmyāb

apne kisī bhī fe'l se bātoñ se soch se

hargiz kisī kā jiinā na kariye kabhī 'azāb

kaise bhalā ġhurūr-o-takabbur kare koī

madfūn ho ke honā hai ik din hameñ turāb

koshish yahī hai apnī ki 'ashraf' jahān meñ

dast-e-hunar se karte raheñ lafz bāryāb

mujh tak rasai pae kahan mehr-o-mahtab

har ek ko nahin hai mera qurb dastyab

pahunchai dur dur talak 'ilm-o-agahi

apne tain kiya hai jahan-bhar ko faiz-yab

garche rah-e-junun mein hue barha sitam

phir bhi yaqin hai hamein hum honge kaamyab

apne kisi bhi fe'l se baaton se soch se

hargiz kisi ka jina na kariye kabhi 'azab

kaise bhala ghurur-o-takabbur kare koi

madfun ho ke hona hai ek din hamein turab

koshish yahi hai apni ki 'ashraf' jahan mein

dast-e-hunar se karte rahen lafz baryab