mujhe aagahi ka nishan samajh ke miTao mat

mujhe āgahī kā nishāñ samajh ke miTāo mat

ye charāġh jalne lagā hai is ko bujhāo mat

mujhe jāgnā hai tamām umr isī tarah

mujhe sub.h-o-shām ke silsile meñ milāo mat

mujhe ilm hai mire ḳhāl-o-ḳhad meñ kamī hai kyā

mujhe aa.ine kā tilism koī dikhāo mat

maiñ ḳhulūs-e-dil kī bulandiyoñ ke safar pe huuñ

mujhe dāstān-e-fareb koī sunāo mat

mujhe dekh lene do sub.h-e-fardā kī raushnī

mirī aañkh se abhī haath apnā haTāo mat

vahī peḌ hai vahī shāḳh hai vahī naam hai

jo girā hai phuul yahāñ se us ko uThāo mat

mujhe tah meñ jā ke uchhālne haiñ guhar ka.ī

maiñ huuñ mutma.in mujhe Dūbne se bachāo mat

tumheñ be-maqām rafāqatoñ kī talāsh hai

mirā shahr shahr-e-sabāt hai yahāñ aao mat

mujhe aagahi ka nishan samajh ke miTao mat

ye charagh jalne laga hai is ko bujhao mat

mujhe jagna hai tamam umr isi tarah

mujhe subh-o-sham ke silsile mein milao mat

mujhe ilm hai mere KHal-o-KHad mein kami hai kya

mujhe aaine ka tilism koi dikhao mat

main KHulus-e-dil ki bulandiyon ke safar pe hun

mujhe dastan-e-fareb koi sunao mat

mujhe dekh lene do subh-e-farda ki raushni

meri aankh se abhi hath apna haTao mat

wahi peD hai wahi shaKH hai wahi nam hai

jo gira hai phul yahan se us ko uThao mat

mujhe tah mein ja ke uchhaalne hain guhar kai

main hun mutmain mujhe Dubne se bachao mat

tumhein be-maqam rafaqaton ki talash hai

mera shahr shahr-e-sabaat hai yahan aao mat