mujhe ab hawa-e-chaman nahin ki qafas mein guna qarar hai

mujhe ab havā-e-chaman nahīñ ki qafas meñ guuna qarār hai

ye to pichhle saal jo aa.ī thī vahī chaar din kī bahār hai

haiñ jigar meñ daaġh lahū hai dil haiñ tar āñkheñ siina figār hai

yahī rañg-o-bū yahī fasl-e-gul yahī be-kasoñ kī bahār hai

koī hasb-e-hāl ḳhitāb ho mire dil ko dil na kahā karo

use kyuuñ bahār kā naam do jo ḳhizāñ nasīb-e-bahār hai

haiñ payām-e-āmad-e-shām-e-ġham ruḳh-e-āftāb kī zardiyāñ

ye tamām din to kuchh aur thā magar ab charāġh-e-mazār hai

jo guloñ ne chehre pe mal liyā jo kalī ne maañg meñ bhar liyā

vo ghaḌī bhī aa.egī dekhnā yahī rañg ḳhūn-e-bahār he

faqat ek ḳhaak kā Dher hai ye baġhaur dekh rahe ho kyā

sar-e-lauh likkhā huā hai kuchh chalo bhī kisī kā mazār hai

jo tire pasīne kī bū na de to kuchh aur hai gul-e-tar nahīñ

jo taḌap na de tire husn kī vo bahār nañg-e-bahār hai

ye maqām-e-ishq hai kaun sā ye haiñ kaisī sabr kī manzileñ

na taḌap hai dil meñ na dard hai na sukūn hai na qarār hai

ye sadā to hai vahī dukh bharī mire kaan jis se haiñ āshnā

zarā chup raho mujhe sunñe do ye to mere dil kī pukār hai

tire dil kī bhī na kalī khile tire haath TūTeñ ḳhudā kare

jise toḌe letā hai bāġhbāñ yahī phuul jān-e-bahār hai

ye ajab masarrat-e-ishq hai jo ik ashk ban ke Tapak paḌī

ye 'sirāj' merā nasīb hai ki ḳhushī bhī ġham-ba-kanār hai

mujhe ab hawa-e-chaman nahin ki qafas mein guna qarar hai

ye to pichhle sal jo aai thi wahi chaar din ki bahaar hai

hain jigar mein dagh lahu hai dil hain tar aankhen sina figar hai

yahi rang-o-bu yahi fasl-e-gul yahi be-kason ki bahaar hai

koi hasb-e-haal KHitab ho mere dil ko dil na kaha karo

use kyun bahaar ka nam do jo KHizan nasib-e-bahaar hai

hain payam-e-amad-e-sham-e-gham ruKH-e-aftab ki zardiyan

ye tamam din to kuchh aur tha magar ab charagh-e-mazar hai

jo gulon ne chehre pe mal liya jo kali ne mang mein bhar liya

wo ghaDi bhi aaegi dekhna yahi rang KHun-e-bahaar he

faqat ek KHak ka Dher hai ye baghaur dekh rahe ho kya

sar-e-lauh likkha hua hai kuchh chalo bhi kisi ka mazar hai

jo tere pasine ki bu na de to kuchh aur hai gul-e-tar nahin

jo taDap na de tere husn ki wo bahaar nang-e-bahaar hai

ye maqam-e-ishq hai kaun sa ye hain kaisi sabr ki manzilen

na taDap hai dil mein na dard hai na sukun hai na qarar hai

ye sada to hai wahi dukh bhari mere kan jis se hain aashna

zara chup raho mujhe sunne do ye to mere dil ki pukar hai

tere dil ki bhi na kali khile tere hath TuTen KHuda kare

jise toDe leta hai baghban yahi phul jaan-e-bahaar hai

ye ajab masarrat-e-ishq hai jo ek ashk ban ke Tapak paDi

ye 'siraj' mera nasib hai ki KHushi bhi gham-ba-kanar hai