mujhe aziz bahut tha jo ham-suKHan mera

mujhe aziiz bahut thā jo ham-suḳhan merā

usī ne pheñk diyā dhartī par gagan merā

maiñ ḳhud ko dekh rahā huuñ baḌe ta.ajjub se

paḌā huā hai mire sāmne badan merā

uThā na paayā qadam bāvajūd-e-koshish ke

mazāq uḌātī rahī rāt-bhar thakan merā

qarīb thā ki mirī ruuh tak jhulas jaatī

qarīb thā ki koī nochtā badan merā

Dare Dare haiñ sabhī phuul is añdhere se

hisār-e-shab meñ muqayyad hai ye chaman merā

tirī talāsh meñ jab jism thak ke girtā hai

ḳhayāl rahtā hai phir bhī ye gāmzan merā

paḌā huā hai mirā jism kab se miTTī par

chalā gayā hai kahāñ jaane gorkan merā

tumhāre baa'd rahā huuñ maiñ dhuup chhāñv meñ

nabūd-o-būd meñ jiinā huā kaThin merā

mujhe aziz bahut tha jo ham-suKHan mera

usi ne phenk diya dharti par gagan mera

main KHud ko dekh raha hun baDe tajjub se

paDa hua hai mere samne badan mera

uTha na paya qadam bawajud-e-koshish ke

mazaq uDati rahi raat-bhar thakan mera

qarib tha ki meri ruh tak jhulas jati

qarib tha ki koi nochta badan mera

Dare Dare hain sabhi phul is andhere se

hisar-e-shab mein muqayyad hai ye chaman mera

teri talash mein jab jism thak ke girta hai

KHayal rahta hai phir bhi ye gamzan mera

paDa hua hai mera jism kab se miTTi par

chala gaya hai kahan jaane gorkan mera

tumhaare ba'd raha hun main dhup chhanw mein

nabud-o-bud mein jina hua kaThin mera