mujhe bhi apna sharik-e-safar shumar karo

mujhe bhī apnā sharīk-e-safar shumār karo

sahar ke bujhte diyo merā intizār karo

hamārā zauq-e-numū kyā shikasta shīshe haiñ

ham ā.inoñ ko atā parda-e-ġhubār karo

hamāre ashkoñ kī me.arāj apne dāman tak

tum apnī pākī-e-dāmāñ kā e'tibār karo

chhupā.e jaao yūñhī daaġh daaġh sīnoñ ko

ḳhayāl-e-bekasī-e-ismat-e-bahār karo

na do duā-e-ḳhirad mujh ko ḳhair-andesho

jo kar sako to mirī vahshatoñ se pyaar karo

phir aaj ishq 'musavvir' huā hai ḳhāk-basar

phir ehtimām-e-urūj-e-salīb-o-dār karo

mujhe bhi apna sharik-e-safar shumar karo

sahar ke bujhte diyo mera intizar karo

hamara zauq-e-numu kya shikasta shishe hain

hum aainon ko ata parda-e-ghubar karo

hamare ashkon ki mearaj apne daman tak

tum apni paki-e-daman ka e'tibar karo

chhupae jao yunhi dagh dagh sinon ko

KHayal-e-bekasi-e-ismat-e-bahaar karo

na do dua-e-KHirad mujh ko KHair-andesho

jo kar sako to meri wahshaton se pyar karo

phir aaj ishq 'musawwir' hua hai KHak-basar

phir ehtimam-e-uruj-e-salib-o-dar karo