mujhe bhul jaane wale teri be-ruKHi salamat

mujhe bhuul jaane vaale tirī be-ruḳhī salāmat

ġham-e-ishq dene vaale tirī zindagī salāmat

tirī yaad jab bhī aa.ī mire dil ne ye duā dī

tū rahe jahāñ meñ shādāñ tirī har ḳhushī salāmat

jo tirī nazar ne baḳhshī thī ḳhalish mire jigar ko

hai ḳhudā gavāh merā vo hai aaj bhī salāmat

mire āñsuoñ kā tūfāñ na rukā na ruk sakegā

tire dard ne jo baḳhshī hai vo bekalī salāmat

mirā ghar balā se raushan na huā to us kā kyā ġham

mire chāñd tā-abad tū tirī chāñdnī salāmat

mirī dāstān-e-ulfat jo sunī to hañs ke bole

hai mire hī ġham ke sadqe tirī shā.irī salāmat

tire girya hī ne 'shabnam' hai Duboī terī kashtī

ki vo sāhil-e-baqā tak na pahuñch sakī salāmat

mujhe bhul jaane wale teri be-ruKHi salamat

gham-e-ishq dene wale teri zindagi salamat

teri yaad jab bhi aai mere dil ne ye dua di

tu rahe jahan mein shadan teri har KHushi salamat

jo teri nazar ne baKHshi thi KHalish mere jigar ko

hai KHuda gawah mera wo hai aaj bhi salamat

mere aansuon ka tufan na ruka na ruk sakega

tere dard ne jo baKHshi hai wo bekali salamat

mera ghar bala se raushan na hua to us ka kya gham

mere chand ta-abad tu teri chandni salamat

meri dastan-e-ulfat jo suni to hans ke bole

hai mere hi gham ke sadqe teri shairi salamat

tere girya hi ne 'shabnam' hai Duboi teri kashti

ki wo sahil-e-baqa tak na pahunch saki salamat