mujhe hoti hai aziyyat baDi tayyari mein

mujhe hotī hai aziyyat baḌī tayyārī meñ

us ke kapḌe haiñ abhī tak mirī almārī meñ

haal aisā hai mirī jaan bichhaḌ kar tujh se

jaise achchhā nahīñ lagtā koī bīmārī meñ

maut hī un ko jagā.e to jagā.e sāhib

log mashġhūl haiñ ḳhvāboñ kī ḳharīdārī meñ

mujhe maarā hai mirī saarī tamannāoñ ne

rahm-dil koī nahīñ lashkar-e-tātārī meñ

log ḳhush-bāsh haiñ kitne na.ī colony ke

aur parinde haiñ daraḳhtoñ kī azā-dārī meñ

bārish-e-dard-e-judā.ī kabhī ruktī hī nahīñ

raat din rahtā huuñ maiñ sher kī sarshārī meñ

maiñ ne kahnā hai bas itnā hī mire dost ki dost

bante āsānī meñ haiñ khulte haiñ dushvārī meñ

mālik-e-tuḳhm-e-tamanna ne chhupā rakkhā thā

merī ta.amīr kā rasta mirī mismārī meñ

mere ik dost ne jab merī jaḌeñ kaaTī thiiñ

kahīñ masrūf thā us din maiñ shajar-kārī meñ

mujhe hoti hai aziyyat baDi tayyari mein

us ke kapDe hain abhi tak meri almari mein

haal aisa hai meri jaan bichhaD kar tujh se

jaise achchha nahin lagta koi bimari mein

maut hi un ko jagae to jagae sahib

log mashghul hain KHwabon ki KHaridari mein

mujhe mara hai meri sari tamannaon ne

rahm-dil koi nahin lashkar-e-tatari mein

log KHush-bash hain kitne nai colony ke

aur parinde hain daraKHton ki aza-dari mein

barish-e-dard-e-judai kabhi rukti hi nahin

raat din rahta hun main sher ki sarshaari mein

main ne kahna hai bas itna hi mere dost ki dost

bante aasani mein hain khulte hain dushwari mein

malik-e-tuKHm-e-tamanna ne chhupa rakkha tha

meri tamir ka rasta meri mismari mein

mere ek dost ne jab meri jaDen kaTi thin

kahin masruf tha us din main shajar-kari mein