mujhe is ka koi gila nahin ki bahaar ne mujhe kya diya

mujhe is kā koī gila nahīñ ki bahār ne mujhe kyā diyā

tirī aarzū to nikāl dī tirā hausla to baḌhā diyā

go sitam ne tere har ik tarah mujhe nā-umīd banā diyā

ye mirī vafā kā kamāl hai ki nibāh kar ke dikhā diyā

koī bazm ho koī anjuman ye shi.ār apnā qadīm hai

jahāñ raushnī kī kamī milī vahīñ ik charāġh jalā diyā

tujhe ab bhī mere ḳhulūs kā na yaqīn aa.e to kyā karūñ

tire gesuoñ ko sañvār kar tujhe aa.ina bhī dikhā diyā

merī shā.irī meñ tire sivā koī mājrā hai na mudda.ā

jo tirī nazar kā fasāna thā vo mirī ġhazal ne sunā diyā

ye ġharīb 'ājiz'-e-be-vatan ye ġhubār-e-ḳhātir-e-anjuman

ye ḳharāb jis ke liye huā usī bevafā ne bhulā diyā

mujhe is ka koi gila nahin ki bahaar ne mujhe kya diya

teri aarzu to nikal di tera hausla to baDha diya

go sitam ne tere har ek tarah mujhe na-umid bana diya

ye meri wafa ka kamal hai ki nibah kar ke dikha diya

koi bazm ho koi anjuman ye shiar apna qadim hai

jahan raushni ki kami mili wahin ek charagh jala diya

tujhe ab bhi mere KHulus ka na yaqin aae to kya karun

tere gesuon ko sanwar kar tujhe aaina bhi dikha diya

meri shairi mein tere siwa koi majra hai na muddaa

jo teri nazar ka fasana tha wo meri ghazal ne suna diya

ye gharib 'ajiz'-e-be-watan ye ghubar-e-KHatir-e-anjuman

ye KHarab jis ke liye hua usi bewafa ne bhula diya