mujhe jis ne mara hai wo dil yahi hai

mujhe jis ne maarā hai vo dil yahī hai

vo dushman yahī hai vo qātil yahī hai

kabhī the bhare is meñ armān lākhoñ

aur ab koī dekhe ki vo dil yahī hai

mujhe le gayā shauq jab un ke dar par

pukārī ajal kū-e-qātil yahī hai

tirī aañkh ḳhud kar rahī hai ishārā

ki muñh chuum lene ke qābil yahī hai

ye sab jānte haiñ ki tum ho masīhā

samajhte haiñ ye bhī ki qātil yahī hai

ye rut ye havā.eñ ye bādal ye bijlī

piyo khul ke duniyā kā hāsil yahī hai

phañsī kashti-e-dil jo girdāb-e-ġham meñ

to qismat pukārī ki sāhil yahī hai

jise kas ke juuḌe meñ bāñdhā hai tum ne

hazāroñ meñ kah duuñ mirā dil yahī hai

samajhne lage mujh ko dushman se baḌh kar

mire dil lagāne kā hāsil yahī hai

gale mil ke mujh se shab-e-vasl bole

ki furqat kī rātoñ kā hāsil yahī hai

jo 'gustāḳh' pahuñche bahisht-e-barīñ meñ

to samjhe ki navvāb castle yahī hai

mujhe jis ne mara hai wo dil yahi hai

wo dushman yahi hai wo qatil yahi hai

kabhi the bhare is mein arman lakhon

aur ab koi dekhe ki wo dil yahi hai

mujhe le gaya shauq jab un ke dar par

pukari ajal ku-e-qatil yahi hai

teri aankh KHud kar rahi hai ishaara

ki munh chum lene ke qabil yahi hai

ye sab jaante hain ki tum ho masiha

samajhte hain ye bhi ki qatil yahi hai

ye rut ye hawaen ye baadal ye bijli

piyo khul ke duniya ka hasil yahi hai

phansi kashti-e-dil jo girdab-e-gham mein

to qismat pukari ki sahil yahi hai

jise kas ke juDe mein bandha hai tum ne

hazaron mein kah dun mera dil yahi hai

samajhne lage mujh ko dushman se baDh kar

mere dil lagane ka hasil yahi hai

gale mil ke mujh se shab-e-wasl bole

ki furqat ki raaton ka hasil yahi hai

jo 'gustaKH' pahunche bahisht-e-barin mein

to samjhe ki nawwab castle yahi hai