mujhe jis ne mera pata diya wo gham-e-nihan mere sath hai

mujhe jis ne merā patā diyā vo ġham-e-nihāñ mire saath hai

mirī zindagī mirī raushnī dil‌-be-amāñ mire saath hai

mirā kārvāñ jo bichhaḌ gayā mire dil kā naqsh bigaḌ gayā

maiñ huuñ ik musāfir gum-shuda so yahī fuġhāñ mire saath hai

isī aarzū kī taḌap liye yūñhī phir rahā huuñ maiñ dar-ba-dar

vahī ḳhaak hai mire sar meñ bhī vahī āsmāñ mire saath hai

ye jo aañkh aaj chhalak uThī mire dil kā bhed hī khul gayā

maiñ samajh rahā thā ye ab talak ġham-e-be-nishāñ mire saath hai

jo ga.e dinoñ pe uThī nazar mire dil ne ḳhud ye kahā mujhe

maiñ kisī tilism-kade meñ huuñ koī dāstāñ mire saath hai

baḌī muddatoñ ke ba.ad jo ab tirī yaad aa.ī to yuuñ lagā

sar-e-dasht-e-vahshat zindagī koī mehrbāñ mire saath hai

yahī soch kar maiñ huuñ mutma.in tahī-dast phir bhī nahīñ huuñ maiñ

mire dost go ki chale ga.e ġham-e-dostāñ mire saath hai

kisī taal par kisī taan par mirī ruuh aaj hai vajd meñ

mirā vahm hai ki haqīqatan koī naġhma-ḳhvāñ mire saath hai

ye ajab rañg-e-mizāj hai magar ab yahī mujhe raas hai

kabhī DhūñDhtā huuñ maiñ ḳhud ko bhī kabhī ik jahāñ mire saath hai

mujhe jis ne mera pata diya wo gham-e-nihan mere sath hai

meri zindagi meri raushni dil‌-be-aman mere sath hai

mera karwan jo bichhaD gaya mere dil ka naqsh bigaD gaya

main hun ek musafir gum-shuda so yahi fughan mere sath hai

isi aarzu ki taDap liye yunhi phir raha hun main dar-ba-dar

wahi KHak hai mere sar mein bhi wahi aasman mere sath hai

ye jo aankh aaj chhalak uThi mere dil ka bhed hi khul gaya

main samajh raha tha ye ab talak gham-e-be-nishan mere sath hai

jo gae dinon pe uThi nazar mere dil ne KHud ye kaha mujhe

main kisi tilism-kade mein hun koi dastan mere sath hai

baDi muddaton ke baad jo ab teri yaad aai to yun laga

sar-e-dasht-e-wahshat zindagi koi mehrban mere sath hai

yahi soch kar main hun mutmain tahi-dast phir bhi nahin hun main

mere dost go ki chale gae gham-e-dostan mere sath hai

kisi tal par kisi tan par meri ruh aaj hai wajd mein

mera wahm hai ki haqiqatan koi naghma-KHwan mere sath hai

ye ajab rang-e-mizaj hai magar ab yahi mujhe ras hai

kabhi DhunDhta hun main KHud ko bhi kabhi ek jahan mere sath hai