mujhe koi kyon sameTe meri raushni mein kya hai

mujhe koī kyoñ sameTe mirī raushnī meñ kyā hai

vo charāġh-e-rahguzar huuñ jo pas-e-sahar jalā hai

koī aisā hādisa ho ki mujhī ko dafn kar de

jo taras-taras ke barse vo ġhubār-e-dard kyā hai

tire zehn kā dhuāñ bhī na chhupā sakā vo manzar

jise kaaT kar girāyā vo shajar vahīñ khaḌā hai

mujhe kyā dikhā rahe ho mirā dāġh-e-nā-rasā.ī

mirī justujū se pūchho koī rāsta bachā hai

mujhe Dar hai āsmāñ bhī kahīñ zad meñ aa na jaa.e

tah-e-ḳhāk jo lahū hai vo zamīñ kī badduā hai

tire tesha-e-junūñ se haiñ lahū-lahū chaTāneñ

are kuchh to sochnā thā tah-e-sang aa.ina hai

tujhe bhūlne meñ shāyad mirī umr biit jaa.e

tujhe bhūlne se pahle mujhe ḳhud ko bhūlnā hai

na kahīñ kitāb meñ huuñ na kisī ke dil meñ 'qaisar'

maiñ ḳhayāl-e-rā.egāñ huuñ mujhe kaun sochtā hai

mujhe koi kyon sameTe meri raushni mein kya hai

wo charagh-e-rahguzar hun jo pas-e-sahar jala hai

koi aisa hadisa ho ki mujhi ko dafn kar de

jo taras-taras ke barse wo ghubar-e-dard kya hai

tere zehn ka dhuan bhi na chhupa saka wo manzar

jise kaT kar giraya wo shajar wahin khaDa hai

mujhe kya dikha rahe ho mera dagh-e-na-rasai

meri justuju se puchho koi rasta bacha hai

mujhe Dar hai aasman bhi kahin zad mein aa na jae

tah-e-KHak jo lahu hai wo zamin ki baddua hai

tere tesha-e-junun se hain lahu-lahu chaTanen

are kuchh to sochna tha tah-e-sang aaina hai

tujhe bhulne mein shayad meri umr bit jae

tujhe bhulne se pahle mujhe KHud ko bhulna hai

na kahin kitab mein hun na kisi ke dil mein 'qaisar'

main KHayal-e-raegan hun mujhe kaun sochta hai