mujhe laga meri qismat mein hai likha patthar

mujhe lagā mirī qismat meñ hai likhā patthar

jo mere sar pe kisī sū se aa girā patthar

kisī se jabki mirī koī dushmanī bhī nahīñ

ye kis ne aa ke mirī raah meñ rakhā patthar

vo aañsū jis ko kabhī log gul samajhte the

jo merī aañkh se Tapkā to ho gayā patthar

zamāne mo'jiza-e-haq to tū ne dekhā hai

nabī ke hukm se jab bolne lagā patthar

jo aa.ine ko muqābil meñ rakh diyā maiñ ne

kisī ne taish meñ aa kar uThā liyā patthar

sitam-zarīfī-e-hālāt ke sabab 'adnān'

jo shaḳhs mom kī sūrat thā ho gayā patthar

mujhe laga meri qismat mein hai likha patthar

jo mere sar pe kisi su se aa gira patthar

kisi se jabki meri koi dushmani bhi nahin

ye kis ne aa ke meri rah mein rakha patthar

wo aansu jis ko kabhi log gul samajhte the

jo meri aankh se Tapka to ho gaya patthar

zamane mo'jiza-e-haq to tu ne dekha hai

nabi ke hukm se jab bolne laga patthar

jo aaine ko muqabil mein rakh diya main ne

kisi ne taish mein aa kar uTha liya patthar

sitam-zarifi-e-haalat ke sabab 'adnan'

jo shaKHs mom ki surat tha ho gaya patthar