mujhe masumiyat se dekhta hai

mujhe ma.asūmiyat se dekhtā hai

vo dhokā khaa.e hai yā de rahā hai

maiñ kitnā ajnabī huuñ apnī ḳhātir

mujhe har aadmī pahchāntā hai

ajab hai terī yak-rañgī ki pyāre

jahāñ tak dekhtā huuñ aa.ina hai

hamārī bhuuk se bhūkī hai duniyā

hamārī pyaas se sahrā banā hai

nikal bhī lo ki is bastī meñ aksar

darīchoñ se samundar jhāñktā hai

vo apne haath par mehñdī rachā kar

muqaddar kī lakīreñ DhūñDhtā hai

tire hoñToñ kī nam golā.iyoñ meñ

na jaane kis ke dukh kā zā.iqa hai

kahīñ 'pāshī' kahīñ 'alvī' kahīñ 'ashk'

bas ik dukh hai magar ka.ī tarah kā hai

mujhe masumiyat se dekhta hai

wo dhoka khae hai ya de raha hai

main kitna ajnabi hun apni KHatir

mujhe har aadmi pahchanta hai

ajab hai teri yak-rangi ki pyare

jahan tak dekhta hun aaina hai

hamari bhuk se bhuki hai duniya

hamari pyas se sahra bana hai

nikal bhi lo ki is basti mein aksar

darichon se samundar jhankta hai

wo apne hath par mehndi racha kar

muqaddar ki lakiren DhunDhta hai

tere honTon ki nam golaiyon mein

na jaane kis ke dukh ka zaiqa hai

kahin 'pashi' kahin 'alwi' kahin 'ashk'

bas ek dukh hai magar kai tarah ka hai