mujhe miTata raha hai ye aasman bahut

mujhe miTātā rahā hai ye āsmān bahut

magar zamīñ pe haiñ ab bhī mire nishān bahut

hai lutf kuchh to hai mere jadīd lahje meñ

qadīm varna hai merī bhī dāstān bahut

talāsh ho bhī to kyā sāya-e-shajar kī mujhe

mire liye hai ye sūraj kā sā.ebān bahut

ab aage un ke diloñ meñ hai kyā ḳhudā jaane

nazar to aate haiñ ye log mehrbān bahut

ajab nahīñ ki maiñ dariyā na paar kar pā.ūñ

shikasta hai mirī kashtī kā bādbān bahut

bahā.e pyaar ne chashme hazār-hā lekin

hai saḳht ab bhī tire dard kī chaTān bahut

patā nahīñ ye mujhe āj-kal huā kyā hai

maiñ apnī zaat se 'ḳhāvar' huuñ bad-gumān bahut

mujhe miTata raha hai ye aasman bahut

magar zamin pe hain ab bhi mere nishan bahut

hai lutf kuchh to hai mere jadid lahje mein

qadim warna hai meri bhi dastan bahut

talash ho bhi to kya saya-e-shajar ki mujhe

mere liye hai ye suraj ka saeban bahut

ab aage un ke dilon mein hai kya KHuda jaane

nazar to aate hain ye log mehrban bahut

ajab nahin ki main dariya na par kar paun

shikasta hai meri kashti ka baadban bahut

bahae pyar ne chashme hazar-ha lekin

hai saKHt ab bhi tere dard ki chaTan bahut

pata nahin ye mujhe aaj-kal hua kya hai

main apni zat se 'KHawar' hun bad-guman bahut