mujhe muflisi ne banaya hai shair

mujhe muflisī ne banāyā hai shā'ir

mirī shā'irī hai shikāyat kā paikar

ji.e muflisī meñ mare muflisī meñ

kafan bhī jo pahnā to maqrūz ho kar

mirī zindagī meñ sukūñ hī nahīñ hai

azal se maiñ laayā huuñ aisā muqaddar

mujhe mahfiloñ se mohabbat nahīñ hai

mirī zindagī mahfiloñ se hai bāhar

agar tum ko mujh se 'adāvat nahīñ to

chhupā.e ho kyoñ āstīnoñ meñ ḳhanjar

jise dekh kar kaañp jaa.e kaleja

ḳhudā ne dikhā.e mujhe aise manzar

mirī shā'irī meñ nahīñ husn-e-duniyā

mirī shā'irī hai ġhamoñ kā samundar

nigāh-e-karam chāhtā huuñ maiñ un se

magar be-niyāzī ke haiñ un ke tevar

abhī ḳhuun baaqī hai merī ragoñ meñ

uThāo to shamshīr maaro gale par

vo 'mahfūz' kamzor tanhā khaḌā hai

magar phir bhī bātil se letā hai Takkar

mujhe muflisi ne banaya hai sha'ir

meri sha'iri hai shikayat ka paikar

jie muflisi mein mare muflisi mein

kafan bhi jo pahna to maqruz ho kar

meri zindagi mein sukun hi nahin hai

azal se main laya hun aisa muqaddar

mujhe mahfilon se mohabbat nahin hai

meri zindagi mahfilon se hai bahar

agar tum ko mujh se 'adawat nahin to

chhupae ho kyon aastinon mein KHanjar

jise dekh kar kanp jae kaleja

KHuda ne dikhae mujhe aise manzar

meri sha'iri mein nahin husn-e-duniya

meri sha'iri hai ghamon ka samundar

nigah-e-karam chahta hun main un se

magar be-niyazi ke hain un ke tewar

abhi KHun baqi hai meri ragon mein

uThao to shamshir maro gale par

wo 'mahfuz' kamzor tanha khaDa hai

magar phir bhi baatil se leta hai Takkar