mujhe pattharon se baDh kar teri ek kali ne mara

mujhe pattharoñ se baḌh kar tirī ik kalī ne maarā

mujhe dushmanoñ se baḌh kar tirī dostī ne maarā

ġham-e-rozgār sah kar maiñ to jī rahā thā phir bhī

mire nā-tavān dil ko tirī āshiqī ne maarā

na gila karūñ na shikva na zamāne kā na terā

mujhe merī bad-nasībī mirī bebasī ne maarā

na hī tīr-e-nīm-kash ne na hī bijliyoñ ne maarā

mire nā-tavān dil ko tirī sādgī ne maarā

mire zaḳhm ke jharoke tire dard se haiñ raushan

isī darja lā-davā kī mujhe raushnī ne maarā

mujhe maut kā nahīñ ġham vo to aa.egī yaqīnan

jise ham gale lagā.e usī zindagī ne maarā

mujhe pattharon se baDh kar teri ek kali ne mara

mujhe dushmanon se baDh kar teri dosti ne mara

gham-e-rozgar sah kar main to ji raha tha phir bhi

mere na-tawan dil ko teri aashiqi ne mara

na gila karun na shikwa na zamane ka na tera

mujhe meri bad-nasibi meri bebasi ne mara

na hi tir-e-nim-kash ne na hi bijliyon ne mara

mere na-tawan dil ko teri sadgi ne mara

mere zaKHm ke jharoke tere dard se hain raushan

isi darja la-dawa ki mujhe raushni ne mara

mujhe maut ka nahin gham wo to aaegi yaqinan

jise hum gale lagae usi zindagi ne mara