mujhe rulate hain KHud muskurae jate hain

mujhe rulāte haiñ ḳhud muskurā.e jaate haiñ

hañsī hañsī meñ vo mujh ko miTā.e jaate haiñ

ye un kī bazm hai kyā kaam sham-e-sozāñ kā

yahāñ charāġh nahīñ dil jaa.e jaate haiñ

kuchh is qadar hameñ majbūr kar diyā dil ne

ki baar baar vahāñ bin bulā.e jaate haiñ

ye kis ko dekh liyā kaun jalva-farmā hai

ki mere qalb-o-nazar jagmagā.e jaate haiñ

shabāb kahte haiñ kis ko sukūn shai kyā hai

ye qisse roz mujhe kyoñ sunā.e jaate haiñ

vo ḳhush-nasīb haiñ kitne jahān-e-ulfat meñ

jo bazm-e-nāz meñ un kī bulā.e jaate haiñ

jo bach rahe the havādis ke tund jhoñke se

vo chaar tinke bhī mere jalā.e jaate haiñ

mujhe rulate hain KHud muskurae jate hain

hansi hansi mein wo mujh ko miTae jate hain

ye un ki bazm hai kya kaam sham-e-sozan ka

yahan charagh nahin dil jae jate hain

kuchh is qadar hamein majbur kar diya dil ne

ki bar bar wahan bin bulae jate hain

ye kis ko dekh liya kaun jalwa-farma hai

ki mere qalb-o-nazar jagmagae jate hain

shabab kahte hain kis ko sukun shai kya hai

ye qisse roz mujhe kyon sunae jate hain

wo KHush-nasib hain kitne jahan-e-ulfat mein

jo bazm-e-naz mein un ki bulae jate hain

jo bach rahe the hawadis ke tund jhonke se

wo chaar tinke bhi mere jalae jate hain