mujhe suno ki hadis-e-ghazal-numa hun main

mujhe suno ki hadīs-e-ġhazal-numā huuñ maiñ

mujhe paḌho varaq-e-mus.haf-e-vafā huuñ meñ

milegī is meñ tumheñ apne dil kī dhaḌkan bhī

kisī ke qalb-e-shikasta kī ik sadā huuñ maiñ

tamām raat jo laḌtā rahā añdheroñ meñ

harīm-e-ishq kā vo āḳhirī diyā huuñ maiñ

baḌhā huā hai zamāne meñ kārobār kā qad

ki apne qad se bhī kuchh aur ghaT gayā huuñ maiñ

har ek miltā hai mujh se ab ajnabī kī tarah

ḳhud apne shahr meñ begāna ban gayā huuñ maiñ

ab apnī shakl bhī pahchān meñ nahīñ aatī

kabhī jo bhūle se ā.īna dekhtā huuñ maiñ

na falsafī na mufakkir na mujtahid na ḳhatīb

'vafā' ye kuchh bhī nahīñ huuñ magar vafā huuñ maiñ

mujhe suno ki hadis-e-ghazal-numa hun main

mujhe paDho waraq-e-mushaf-e-wafa hun mein

milegi is mein tumhein apne dil ki dhaDkan bhi

kisi ke qalb-e-shikasta ki ek sada hun main

tamam raat jo laDta raha andheron mein

harim-e-ishq ka wo aaKHiri diya hun main

baDha hua hai zamane mein karobar ka qad

ki apne qad se bhi kuchh aur ghaT gaya hun main

har ek milta hai mujh se ab ajnabi ki tarah

KHud apne shahr mein begana ban gaya hun main

ab apni shakl bhi pahchan mein nahin aati

kabhi jo bhule se aaina dekhta hun main

na falsafi na mufakkir na mujtahid na KHatib

'wafa' ye kuchh bhi nahin hun magar wafa hun main